Obaseki ya rushe dukkanin muƙarraban gwamnatinsa

Obaseki zai miƙa mulki ga sabon zaɓaɓɓen jihar a ranar Talata.

Gwamnan Jihar Edo, Godwin Obaseki, ya rushe Majalisar Zartarwarsa a ranar Juma’a yayin da yake shirin miƙa mulki ga sabon zaɓaɓɓen gwamnan jihar.

Sabon gwamnan jihar, Monday Okpebholo, zai karɓi mulki a ranar Talata, 12 ga watan Nuwamba.

• HOTUNA: Mayaƙan Lakurawa sun kashe mutum 17 a Kebbi
• Fim ɗin ‘Ƙanwata ce’ yana koyar da yadda ake kare haƙƙin ƙanne mata ne –  Yaron l Malam

Obaseki, wanda ya hau mulki a ranar 12 ga watan Nuwamban 2016, zai kammala wa’adinsa tare da miƙa mulki ga Okpebholo, wanda ya lashe zaɓen gwamnan jihar da aka yi a ranar 21 ga watan Satumba, 2024.

Okpebholo na jam’iyyar APC, ya kayar da Asue Ighodalo na jam’iyyar PDP.

Ya rushe majalisar ne bayan wani taron ban kwana a gidan gwamnatin Jihar Edo da ke Birnin Benin.

Obaseki, ya gode wa tawagarsa bisa taimakonsa wajen cimma burinsa a Jihar Edo.

Ya kuma gode wa al’ummar jihar bisa goyon bayansu, addu’o’i, da haɗin kan da suka ba shi a lokacin gudanar da mulkin jihar.

A wajen taron, kwamishinonin da ke shirin barin ofis da shugabannin hukumomi daban-daban sun miƙa lambar yabo da kyaututtuka ga Obaseki yayin da yake shirin barin ofis.