Sabon Birni: ’Yan bindiga sun kara kashe mutane bayan ziyarar Tambuwal

Sa’o’i kadan bayan Gwamna Jihar Sakkwato ya kai ziyarar ta’aziyyar mutanen da ’yan bindiga suka kashe aka kai sabon harin

’Yan bindiga sun hallaka mutum uku a kuayen Kurawa da ke Karamar Hukumar Sabon Birni ta Jibar Sakkwato.

Maharan sun kai farmakin ne a yayin da ake Sallar Isha ranar Alhamis, sa’o’i kadan ziyarar ta’aziyyar da Gwamnan Jihar Sakkawto, Aminu Waziri Tambuwal, ya kai wa iyalan mutanen da ’yan bindiga suka yi wa kisan gilla a yankin.

• Buhari ya tura tawaga ta musamman zuwa Sakkwato da Katsina
• ’Yan Arewa sun shirya wa Buhari gagarumar zanga-zanga

“Da dare ana Sallah suka shigo suka rika luguden wuta kan mai tsautsayi har suka kashe mutum uku suka jikkata wasu da dama da a yanzu ake ba su kulawa a asibiti,” inji wani mazaunin kauyen.

Gwamna Tambuwal ya kai ziyarar ce domin jajanta wa al’ummar Sabon Birni kan rasuwar matafiya 42 da ’yan bindiga suka yi kona kurmus a cikin motarsu a hanyar Sabon Birni zuwa Isa a ranar Litinin.