Sojoji sun ceto mutum 9 daga hannun ‘yan bindiga a Kaduna
Sun kuma yi nasarar kwato shanu 90 da aka sace.
Sojojin Nijar
Dakarun rundunar ‘Operation Forest Sanity’ ta Sojin Kasa na Najeriya sun ceto wasu mutum tara da ‘yan bindiga suka yi garkuwa da su a Jihar Kaduna.
Dakarun sun samu nasarar kubutar da mutanen ne yayin wani samame da suka maboyar ‘yan bindigar da ke garin Kaso a Karamar Hukumar Chikun ta jihar.
- Ban ga laifin masu barin Najeriya don neman ingantacciyar rayuwa ba – Kakakin Buhari
- Qatar 2022: Zafin cin kwallon Moroko ya haddasa tarzoma a Belgium
Kwamishinan Tsaro da Harkokin Cikin Gida na Jihar Kaduna, Samuel Aruwan ya ce sojojin sun yi artabu da ‘yan bindigar ne a babban titin Tantatu, lamarin da ya sa suka tsere cikin dajin.
A sanarwar da ya fitar a ranar Litinin, Aruwan ya ce Sojojin sun yi bincike a sansanin tare da ceto mutum tara da suka yi garkuwa da su.
“Sojojin sun kuma kwato shanu 90 da ‘yan bindigar da suka gudu suka bari wadanda za a mika su ga Hukumar Kula da Kiwon Dabobbi ta Jihar Kaduna domin tantance su,” in ji shi.
Ya ce an gudanar da wani samamen sirri a tsaunin Bawa Rikasa, inda aka samu nasarar kwato babura hudu a hannun barayin daji.
Aruwan, ya ce mutum tara da aka ceto za a tantance su kafin a sake sada su da iyalansu.