Tinubu ya buƙaci Majalisar Dattawa ta amince da naɗin sabon Babban Hafsan Sojin Ƙasa

Shugaba Bola Ahmed Tinubu ya buƙaci Majalisar Dattawa ta amince da naɗin Laftanar Janar Olufemi Oluyede a matsayin Babban Hafsan Sojin Ƙasa na Najeriya. Hakan na ƙunshe cikin wata sanarwa da kakakin shugaban ƙasar, Bayo Onanuga ya fitar ranar Juma’a. Tabbas akwai yunwa a Najeriya amma komai zai daidaita — Tinubu ’Yan bindiga sun sace […]

Shugaba Bola Ahmed Tinubu ya buƙaci Majalisar Dattawa ta amince da naɗin Laftanar Janar Olufemi Oluyede a matsayin Babban Hafsan Sojin Ƙasa na Najeriya.

Hakan na ƙunshe cikin wata sanarwa da kakakin shugaban ƙasar, Bayo Onanuga ya fitar ranar Juma’a.

• Tabbas akwai yunwa a Najeriya amma komai zai daidaita — Tinubu
• ’Yan bindiga sun sace mutum 12 a Kaduna

Onanuga ya ce matakin shugaban ya yi daidai da tanadin kundin tsarin mulkin Najeriya.

Ya ce shugaban ƙasa ya tura wasika a hukumance zuwa Majalisar Dattawa domin tantancewa da tabbatar da sabon hafsan rundunar sojojin ƙasa.

“Shugaba Bola Tinubu ya aike wa Majalisar Dattawa wasiƙa yana neman a tabbatar da naɗin Laftanar Janar Olufemi Olatubosun Oluyede a matsayin Babban Hafsan Sojin Ƙasa (COAS).

“A wasikar da ya aike a yau [Juma’a], Tinubu ya nemi a tabbatar da naɗin Oluyede bisa tanadin sashe na 218 (2) na Kundin Tsarin Mulkin 1999 da kuma sashe na 18 (1) na Dokar Sojoji.”

Ana iya tuna cewa, a ranar 30 ga watan Oktoba ne Tinubu ya naɗa Oluyede a matsayin muƙaddashin Babban Hafsan Sojin Ƙasa a sakamakon rashin lafiyar Laftanar Janar Taoreed Lagbaja.

Amma daga bisani, Janar Lagbaja ya rasu a ranar 5 ga watan Nuwamba, 2024.

A yanzu kuma Shugaba Tinubu ya buƙaci majalisa ta amince da naɗinsa a matsayin babban jami’in sojin ƙasa na Najeriya.

Ya ce yana da ƙwarin gwiwar cewa zai iya jan ragamar sojojin ƙasa wajen tabbatar da zaman lafiya a ƙasar nan.