Tsohon Babban Mai Binciken Kudin Jihar Barno ya rasu

Allah Ya yi wa tsohon Babban Mai Binciken Kudi na Jihar Barno, Malam Abbah Kyari, rasuwa. Ya rasu ne a safiyar yau (Alhamis) a Jami’ar Legas sakamakon wata gobara da ta tashi a gidan Shugaban Jami’ar. Marigayin ya cikin ayarin Shehun Barno Alhaji Abubakar Ibn Umar Garbai ne lokacin da al’amarin ya faru. A yau […]

Allah Ya yi wa tsohon Babban Mai Binciken Kudi na Jihar Barno, Malam Abbah Kyari, rasuwa.

Ya rasu ne a safiyar yau (Alhamis) a Jami’ar Legas sakamakon wata gobara da ta tashi a gidan Shugaban Jami’ar.

Marigayin ya cikin ayarin Shehun Barno Alhaji Abubakar Ibn Umar Garbai ne lokacin da al’amarin ya faru. A yau ne dai aka shirya bikin nadin Shehun Barnon a matsayin Uban Jami’ar.

Wata majiya ta kusa da basaraken wanda ta bukaci a sakaya sunanta, ta shaida wa Aminiya cewa gabarar ta tashi ne da misalin karfe 2:00 na dare daga matsalar wutar lantarki. Majiyar ta ce: “Gobarar ta fara ne da karfe 2:00 na dare kuma an ta yin kokarin kashe ta, amma Malam Kyari ya rasa ransa saboda raunukan da ya samu”

Har ila yau, Aminiya ta samu labarin cewa za a dawo da gawar mamacin Jihar Barno don yi mata jana’iza da misalin karfe 2:00 na ranar yau.