Tsohon shugaban jam’iyyar PDP na Gombe, ya rasu

Ɗan siyasar ya rasu a Jihar Kano, bayan ya sha fama da rashin lafiya.

Allah Ya yi wa Tsohon Shugaban Jam’iyyar PDP na Ƙaramar Hukumar Gombe, Alhaji Idris Bello, wanda aka fi sani da Alhaji Yaro na Gambo Isari, rasuwa.

Alhaji Yaro, ya rasu ne a daren ranar Asabar, a Kano bayan ya sha fama da doguwar jinya.

• Matatar Dangote ta rage farashin man fetur 
• Dokar sake fasalin haraji na barazana ga haɗin kan ƙasa — Dattawan Arewa

An yi jana’izarsa da misalin karfe 1 na rana a Babban Masallacin Juma’a na Izala da ke Bolari.

Gwamnan Jihar Gombe, Muhammad Inuwa Yahaya, ya yi wa iyalansa, jam’iyyar PDP, da al’ummar unguwar Jekadafari ta’aziyya kan rasuwar marigayn.

A wata sanarwa da Babban Daraktan Yaɗa Labaran Gidan Gwamnatin Jihar, Isma’ila Uba Misilli, ya fitar, Gwamna Inuwa ya ce Alhaji Yaro fitaccen ɗan siyasa ne mai ƙwazo, kuma mutuwarsa ta bar gibi mai wahalar cikewa.

Gwamnan, ya yi addu’ar Allah ya jikan sa, ya sa Aljannar Firdausi ce makomarsa.