Yadda ake girka miyar zogale

Akwai hanyoyi da dama da ake girka wannan miya.

Barkanmu da sake haduwa da ku a wannan fili namu na girke-girke. Kamar yadda na saba fadi cewa yana da kyau idan yau an taba miyar birni, gobe kuma sai a sharbi miyar kauye.

Zogale na dauke da sinadaran da suke maganin cututtuka da dama, don haka yana da kyau a koyi yadda ake girka wannan miya.

Akwai hanyoyi da dama da ake girka wannan miya. A yau na kawo muku irin nawa salon girka miyar zogale walau danye ko busasshe.

Za a iya cin wannan miya da tuwon shinkafa ko na dawa da masara da kuma na alkama. Abubuwan da za a bukata:

• Busasshen zogale
• Attarugu
• Nikakkiyar gyada
• Tumatir
• Albasa
• Wake
• Sunadarin Dandano
• Garin tafarnuwa
• Manja
• Nama
• Wake

Yadda ake yin hadin:

Da farko dai za a yanka albasa sannan a jajjaga tumatir da attarugu. A dafa wake ya nuna sosai sannan a ajiye a gefe.

A silala nama da gishiri da albasa. Bayan haka, sai a dora tukunya a wuta sannan a zuba manja, sai a soya albasa ta dan fara soyuwa sannan a zuba jajjagen kayan miyar.

A yi ta soyawa har sai ta soyu kamar miyar dage-dage. Sannan a dauko wannan romon silalen nama da naman a zuba.

A zuba magi da garin tafarnuwa da kori. Sai a rufe tukunyar, bayan ta tafasa sannan a zuba wannan waken a ciki a gauraya har sai ta gaurayu.

Sannan a dauko nikakkiyar gyadar nan a zuba ruwa a gauraya kamar za a yi kunu sannan a zuba a gauraya.

Bayan gyadar ta nuna, sai a dauko busasshe ko danyen zogalen a zuba a gauraya sannan a rufe.

Haka za a yi ta yi har sai zogalen ya nuna sannan a sauke.