Yadda ake kunun shinkafa da madara

Assalamu alaikum Uwargida. Yaya sanyi? Tare da fatar ana girka wa manyan gobe girkin da zai kara musu lafiya da kuzari. A yau na kawo muku yadda ake girka shinkafa mai madara. Kasancewar ana yawan rage abinci musamman ma idan farar shinkafa ce, wani lokaci ana rasa yadda za a yi da ita. Hakan ya […]

Assalamu alaikum Uwargida. Yaya sanyi? Tare da fatar ana girka wa manyan gobe girkin da zai kara musu lafiya da kuzari. A yau na kawo muku yadda ake girka shinkafa mai madara. Kasancewar ana yawan rage abinci musamman ma idan farar shinkafa ce, wani lokaci ana rasa yadda za a yi da ita. Hakan ya sanya a yau na kawo muku wani salon sarrafa wannan ragowar shinkafar. A sha karatu lafiya. Shan wannan kunun na rage wa manyan gobe yin mura a wannan yanayin sanyi.

 

Abubuwan da za a bukata

• Dafaffiyar shinkafa fara

• Madara

• Citta karama kwaya daya

• Sukari

• Kwayar tafarnuwa daya

• Ruwa

 

 

Hadi

A kankare danyar citta sannan a jajjaga ta a zuba ruwa a tace a ajiye a gefe. Sannan a bare tafarnuwa kwaya daya a jajjaga a zuba ruwa a tace. Sannan a hada ruwan tafarnuwar da na cittar a waje daya.

A tafasa shinkafa har sai ta yi laushi, sannan a debo garin madara daidai wadata a zuba a cikin ruwan cittar da tafarnuwar sannan a gauraya.

A zuba ruwan madarar a cikin shinkafar sannan  a dora a kan wuta.  Idan kunun ya fara kauri sannan a zuba sukari yadda ake bukata sai a sauke.

Za a iya shan wannan hadin da soyayyiyar ayaba ko zuma da kosai ko ’ya’yan itatuwa. A sha dadi lafiya!