Yadda ake miyar dage-dage

Assalamu alaikum Uwargida tare da fatan alheri. Miyar dage-dage miya ce wadda ake yinta a tsanake. Ba miya ce wadda za a debo sauri a yi ta sannan a sanya tsammanin ta yi dadi ba. Yadda wata za ta yi nata miyar daban yake ga yadda wata za ta sarrafa miyar dage-dagen. Sannan akwai kura-kurai […]

Assalamu alaikum Uwargida tare da fatan alheri. Miyar dage-dage miya ce wadda ake yinta a tsanake. Ba miya ce wadda za a debo sauri a yi ta sannan a sanya tsammanin ta yi dadi ba. Yadda wata za ta yi nata miyar daban yake ga yadda wata za ta sarrafa miyar dage-dagen. Sannan akwai kura-kurai da mata ke tafkawa wajen sarrafa wannan miyar. Idan lokacin bikin Sallah ya yi nan ne fa za a ga irin miyar da ake kawowa daga makwafta. Wata miyar ko dandanawa ba za a iya yi ba, saboda tsabagen tsami da kuma danyenta. Don haka ne a yau na kawo muku yadda za a sarrafa wannan miyar a tsanake.

Abubuwan da za a bukata

• Tumatir manya 10

•Tattasai kanana hudu

• Attarugu 5

• Albasa karama daya

• Ganda

• Kaza

• Nama

• Kori

• Tafarnuwa

• Man gyada ko man ja

Hadi

Da farko za a wanke wannan kayan miyar da na lissafo sannan a markadata. Daga nan sai a wanke kaza da nama da ganda a silalasu, har sai sun yi laushi. Sai a ajiye a gefe. A dora markaden kayan miya a wuta ya yi ta tafasa har sai ruwan ya tsane. Sannan a zuba man gyada ko man ja a yi ta soyawa, har sai man gyadan ya hauro saman kayan miya. Sai a dauko romon nama a zuba tare da naman a gauraya.

A zuba su magi da kori da kuma garin tafarnuwa, sannan a sake gaurayawa. A rufe na tsawon mintuna biyu, sai a dandana a ji in da tsami. Idan da tsami sai a jika kanwa kadan sosai a ruwa sannan a zuba kamar murfin kwankwalatin Fanta sannan a gauraya idan miyar ta nuna sai a sauke a ci da farar shinkafa.