Yadda mai tallan kifi ya sayar da zinaren sata na N60m a Abuja

Rundunar ta ce za ta gurfanar da su a kotu da zarar ta kammala bincike.

Rundunar ’Yan Sandan Babban Birnin Tarayya, Abuja ta kama wasu mutum uku da ake zargi da fasa wani gida tare da sace zinare da wasu kayayyaki masu tsada a Abuja.

Mataimakin Kwamishinan ’Yan sanda, ACP Olumuyiwa Adejobi ne, ya bayyana hakan a wani taron manema labarai a Abuja.

• Ambaliyar ruwa ta lalata ƙananan hukumomi 3 a Kano — SEMA
• MDD Ta Nemi A Gaggauta Muradun Ci Gaba Mai Ɗorewa Don Cimma Burin 2030

An kama mutanen ne bayan wani bincike da tawagar Binciken Bayanan Sirri (IRT) ta gudanar, wanda ya gano wadanda ke da hannu a laifin.

Bincike ya nuna cewa babban wanda ake zargi yana sana’ar sayar da kifi a Kasuwar Kifi ta Kado da ke Abuja.

Sanarwar ta ce “waɗanda ake zargin sun yi wa gidaje uku fashi a unguwar Lugbe, kafin su shiga na huɗu sun yi amfani da wani ƙarfe wajen banƙara tagar gidan inda ta nan suka samu damar shiga gidan.

“Suna shiga gidan, kai-tsaye suka shiga binciken abin da za su uya sacewa.

“A lokacin da suke lalube, sai suka hangi wani akwati a ajiye, nan take suka ɗauka suka tafi da shi.

“Sun yi amfani da guduma wajen buɗe akwatin, inda suka samu kuɗi, takardu, da zinare a ciki.

“Babban wanda ake zargin, ya kira mai saye sannan ya sayar da kayan satar, kan kuɗi Naira miliyan 60,” a cewar sanarwar.

Rundunar ta ce da zarar ta kammala bincike za ta miƙa su zuwa kotu domim girbar abin da suka aikta.