’Yan bindiga sun harbe malamin Jami’ar UNIZIK, sun sace motarsa
Maharan sun tsere da motar malamin bayan harbe shi har lahira.
’Yan Bindiga sun harbe malamin Jami’ar Nnamdi Azikiwe (UNIZIK), Dokta Osita Chinedu, har lahira a daren Litinin a Jihar Anambra.
Shaidu sun bayyana cewa ’yan bindigar sun tsayar da motar malamin, sannan suka harbe tare da tserewa da motarsa ƙirar Toyota Corolla launin toka.
- Babu sansanin Sojin Faransa a Maiduguri — Sojoji
- Majalisa ta bukaci sojoji su saki shugaban Miyetti Allah
Rundunar ’yan sandan Jihar Anambra, ta tabbatar da lamarin, tare da bayyana cewa ta fara bincike.
Sun buƙaci duk wanda ke da bayanan da za su taimaka wajen kama masu laifin ya kai rahoto zuwa ofishin ’yan sanda mafi kusa da shi.
Wannan harin ya tayar da hankali kan ƙaruwar rashin tsaro a jihar, musamman a cikin birnin Awka.
Mazauna yankin da abokan aikin marigayin sun yi kira ga gwamnati da hukumomin tsaro da su ɗauki matakan gaggawa don magance wannan matsalar tare da tabbatar da tsaron al’umma a jihar.