Yadda ’yan bindiga suka kashe sojoji 5 suka kona motarsu a hanyar Abuja

Yankin Audu Jangwam ya yi kaurin suna da ayyukan ’yan fashi da masu garkuwa da mutane

’Yan bindiga sun kashe sojoji biyar tare da kona motarsu a yankin Audu Jangwam da ke kan hanyar zuwa Abuja a Jihar Kaduna.

Wani basarake a yankin da ya nemi a boye sunansa ya ce ’yan ta’addan sun harbe sojojin har lahira ne a wani harin kwanton bauna.

Ya shaida wa wakilinmu ta wayar salula cewa abin ya faru ne da misalin karfe 6 na yammacin ranar Alhamis a yankin da ke kusa da Sansanin Alheri Camp a kan hanyar Kaduna zuwa Abuja.

Ya bayyana cewa, “’yan bindigar sun kai harin kwanton bauna ne kan sansanin sojoji, inda suka kashe mutane biyar suka kona motarsu.

• Ma’aikatanmu na kai wa ‘yan bindiga bayanai —Jami’ar FUDMA
• Mutum 6 sun jikkata, an ƙone kayayyaki a rikicin fili a Neja

Yankin Audu Jangwam ya yi kaurin suna da ayyukan ’yan fashi da masu garkuwa da mutane

Sojoji sun kwato shanun sata 162

Wakilinmu ya kuma samu labarin cewa a ranar Asabar din da ta gabata ne sojoji suka kwato shanun sata 162 a yayin samamen da suka yi maboyar ’yan bindiga a dajin Iche da ke karamar hukumar Kagarko.

Wani mazaunin garin, Sama’ila Adamu, ya ce an sace shanun ne a wata rugar Fulani makonni biyu da suka gabata.

Kakakin rundunar ’yan sandan jihar Kaduna, ASP Hassan Mansur, bai tabbatar da faruwar lamarin ba.