’Yan sanda sun ceto yara 4 da aka sace daga Bauchi a Anambra

‘Yan sandan sun gano yaran ne bayan an sayarwa wasu mutane a Jihar Anambra.

Rundunar ’Yan Sandan Jihar Anambra, ta ceto wasu yara huɗu da aka sace a Jihar Bauchi, sannan aka sayarwa wasu mutane a Jihar Anambra.

Kwamishinan ’Yan Sandan Jihar, Obono Itam ne, ya bayyana hakan a ranar Litinin yayin wata tattaunawa da manema labarai a Awka.

• Abba ya buƙaci sabbin Kwamishinoni su cika muradun Kanawa
• Miji da mata sun zama Farfesa a tare a BUK

An kama mutum huɗu, ciki har da wata mata da ta karɓi yaran ba bisa ƙa’ida ba.

Waɗanda ake zargin sun amsa laifinsu, kuma ana ƙoƙarin haɗa yaran da iyayensu.

A wani harin haɗin gwiwa da jami’an tsaro suka kai a ranar 24 ga watan Disamban 2024, sun lalata sansanin ’yan ta’adda a ƙauyen Nimo da ke Ƙaramar Hukumar Njikoka.

A yayin wannan samame, jami’an sun gano abubuwa masu fashewa guda 19.

Hakazalika, jami’an sun rushe gine-ginen da ’yan ta’addan ke amfani da su a yankin.

Kwamishinan, ya bayyana cewa an gano sansanin ne bayan samun bayanai daga mutanen da aka kama a baya.

Ya yaba da ƙoƙarin haɗin gwiwar jami’an tsaro wajen bibiyar bayanan sirri don daƙile ayyukan ɓata gari a jihar.