’Yan siyasa suna da wuyar sha’ani –’Yan sanda

Kwamashinan ’Yan sandan Jihar Jigawa Mista Bala Sanchi ya musanta zargin da wadansu ’yan siyasa suke yi cewa wai yana bai wa ’yan kasuwa tsaro a lokacin zaben daya gabata. Kwamishina Sanchi ya ce maganar cewa ya janye wa dan takarar Gwamna na Jam’iyyar PDP, Malam Aminu Ibrahim Ringim jami’an tsaro, babu gaskiya a cikinta, […]

Kwamashinan ’Yan sandan Jihar Jigawa Mista Bala Sanchi ya musanta zargin da wadansu ’yan siyasa suke yi cewa wai yana bai wa ’yan kasuwa tsaro a lokacin zaben daya gabata.

Kwamishina Sanchi ya ce maganar cewa ya janye wa dan takarar Gwamna na Jam’iyyar PDP, Malam Aminu Ibrahim Ringim jami’an tsaro, babu gaskiya a cikinta, batanci ne kawai irin na ’yan siyasa.

Ya nuna takaicinsa a kan al’amarin, inda ya ce ’yan siyasa mutane ne masu wahalar sha’ani. “Babu yadda za a yi ka yi musu daidai a rayuwa,” inji shi.

Ya ce a zaben gwamnonin da za a yi a gobe, za su samar da jam’ian tsaro 5,262 domin tattabar da an gudanar da zaben cikin kwanciyar hankali da zaman lafiya.

A wani labarin ’yan sanda a jihar Jigawa sun kama ’yan daba 113 a yankunan Hadeja da Kazaure da Ringim, inda suka same su da miyagun makamai. Kwamishinan ya ce duk wadanda aka kama, za a gurfanar da su a gaban kotu domin fuskantar hukuncin da ya dace da su da zarar an kammala bincike.