Yarima Mathew ya zama sabon Attah Ighala

An nada Yarima Mathew Opaluwa Oguche a matsayin sabon Attah Ighala.

An zabi Alhjai Mathew Opaluwa Oguche a matsayin sabon sarkin Ighala (Attah Ighala).

Masarautar Ighala ta ayyana Alhaji Mathew a matsayin Attah Ighala ne bayan rasuwar Attah Ighala Igala, Michael Ameh Oboni II a 2020.

• An kai hari a rugar Fulani a Abuja
• ’Yan bindiga sun saki sabon bidiyon daliban Kwalejin Afaka
• An cafke Basarake da iyalansa kan zargin garkuwa da mutane

Sabon Attah Ighalan ya fito ne dan Cif Opaluwa Oguche Akpa ne na Gidan Sarautar Aju Ameacho na Masarautar.

Attah Ighalan ya yi karatunsa na firamare a makarantar St. Boniface a shekarar 1975, sai kuma sakandare a St. Peter’s College, wadda ya kammala a 1980, duk a garin Idah.

Ya yi digirinsa na farko da na biyu a fannin Gudanarwar Kasuwanci a Jami’ar Ahmadu Bello (ABU) da ke Zariya, tsakanin 1981 zuwa 1986.

A 1997 ya sake komawa ABU ya yi wani digiri na biyu kuma a fannin gudanarwar.

Alhaji Mathew tsohon ma’aikaci ne a Hukumar Zabe ta Kasa, inda ya yi aiki a sassa daban-daban, har ya kai matsayi Mataimakin Darakta.