Za a yi jana’izar mahaifiyar Sheikh Ahmad Gumi bayan Azahar

Mahaifiyar Sheikh Ahmad Gumi ta rasu a yammacin ranar Lahadi a wani asibiti.

Mahaifiyar fitaccen malamin addinin Musulunci nan mazaunin Jihar Kaduna, Sheikh Ahmad Abubakar Gumi, ta rasu.

Sheikh Ahmad Gumi ya sanar cewa mahaifiyar tasa ta rasu ne a wani Asibiti da ke garin Abuja da misalin karfe 5:30 na yammacin ranar Lahadi.

• NAJERIYA A YAU: Iyalan Wanda Sojojin Sama Suka Kashe A Funtua Na Neman Agaji
• A tuhumi ’yan siyasa kan karancin abinci a Najeriya —Obasanjo

“Inna lillahi wa inna ilaihi rajiun. Yau ina cikin alhinin ina sanar da rasuwar mahaifiyata…; Don Allah a roka mata gafara da rahamar Allah.

“Maganar karshe da ta yi min makonni uku da suka wuce ita ce,  ‘in sha’a Allahu, Allah Zai sada ta da ’ya’yanta da jikokinta a Aljannah’.

“Wadannan kalaman sun kara min kwarin gwiwa; Allah Ya kai rahamarsa gare ki. Amin,” kamar yadda ya wallafa.

Malamin ya sanar cewar za a yi jana’izarta da misalin karfe 1 na rana a ranar Litinin bayan Sallar Azahar a gidan marigayi Sheikh Abubakar Mahmud Gumi da ke Unguwar Sarki GRA, bayan Lugard Hall, Kaduna.