Zakaran musabakar Alkur’ani na Duniya ya rasu

Mahaddacin shi ya lashe musabakar Alkur’anin da aka yi a Kasashen Kuwait da Qatar.

Sadiq Abdullahi Umar, matashin da ya wakilci Najeriya a musabakar Alkur’ani a ciki da wajen kasar, ya riga mu gidan gaskiya.

A hirar da Aminiya ta yi da wani dan uwan marigayin mai suna Muhammad Kabiru Makarfi, ya ce “Malam Sadiq ya rasu ne a Kasar Sudan bayan wata ‘yar rashin lafiya kimanin kwanaki 26 da komawarsa daga Kano.

• Salah ya sabunta kwantaragin ci gaba da zama a Liverpool
• LABARAN AMINIYA: Kungiyar Kwadago Ta Kira Zanga-Zanga Kan Yajin Aikin ASUU

Marigayi Sadiq ya rasu yana shekaru 26 da haihuwa, ya kuma bar mahaifiyarsa da sauran ‘yan uwa da kuma dangi.

Tuni aka yi jana’izarsa a Sudan kamar addinin musulunci ya tanadar.

Kafin rasuwarsa, mahaddacin shi ya lashe musabakar Alkur’anin da aka yi a Kasashen Kuwait da kuma Qatar.

Shi ne kuma zakaran musabakar da aka yi a Kasar Zanzibar a watan Maris na shekarar 2022.

Baya ga wannan, marigayin ya samar da kafofin koyar da karatun Alkur’anin ta intanet a tashar You tube.