Zalamar zabarin zullon zinarun Zaman-fara

Zirga-zirgar ziyara Zabarin zabura Zungureren zungurun zungura Zanga-zangar zakara Zanyanar zabuwa da zabira   Zugar zuga-zugi Zaman zagi Zirga-zirgar zaren zazzaga Zagaye-zagayen zawaran zarga Zinarin zaman farmakin zargi   An yi wa al’umma kisan gilla An wawushe dukiya an lula Satar bisashe ta sa hasala An shiga kila-wa-kala Mahukunta sun shagala   Lamurra sun tsawwala […]

Zirga-zirgar ziyara

Zabarin zabura

Zungureren zungurun zungura

Zanga-zangar zakara

Zanyanar zabuwa da zabira

 

Zugar zuga-zugi

Zaman zagi

Zirga-zirgar zaren zazzaga

Zagaye-zagayen zawaran zarga

Zinarin zaman farmakin zargi

 

An yi wa al’umma kisan gilla

An wawushe dukiya an lula

Satar bisashe ta sa hasala

An shiga kila-wa-kala

Mahukunta sun shagala

 

Lamurra sun tsawwala

Jinane sun malala

Tsananin tsanantar tsallen tsula

Tsangwamar tsugudidin tsunkula

Lamari mai tayar da hankula

 

Burgar buga-bugar bare

Babban bagire

Babatun bore

Baranbaramar bare-bare

Bare bawon baure

 

Miyagun su ci tare

Hargisi ya kaure

Ko’ina an tattare

An balbalta zaman tare

Kika-kaka a kakkare

 

An tafka asarar matsabbai

An nunke mu a baibai

’Yan uwa na fama da tabbai

An wawure musu kwabai

Danbarwar duban Dubai daga Dabai

 

Zullumin zinari

Zullon zabari

Zankalelen zakakuri

Zangarniyar ziri

Zazzabin zababbakar bari-bari

 

Barayin bisashe

Na ta bushe-bushe

Ka kula Malam Bahaushe

Ka sanar da Baushe

Kowace kafa ku toshe

 

In an toshe kafa

Wata ta rufta

Ana ta kata-kata

’Yan bokoko na ta fafa

Rikicin ko akwai aikin matsafa

 

Masu hakar ma’adani

Sun dauka ba a gani

Tuntuni su sake tunani

Mahukunta sun sani

Dole dai ku bi umarni

 

Mai-duka yai mana magani

Kar mu afka rudani

Magabtanmu ka hane su da tsanani

Mu kyautata ta’adun iyaye da kakani

Mu yasar da wuni-wuni

 

Daidai lokacin da masu zirga-zirgar zanga-zangar Zogin zungurun  zinarin Zaman-fara suka yi tsallen badake a Haurubja, fadar Gwamnatin kasar Haurobiya don nuna alhinin muguwar turka-turkar tabargazar da ake ta tafkawa a Jihar Zaman-fara, wadda a yau ta rikide zuwa JIHAR ZAMAN-FARGABA, kodayake na dade da yin wannan batu a farfajiyar wannan makaranta ta Dodorido da ke cikin Amintacciyar jaridar kasar Haurobiya.

Tayar da kan adda da tafka ta’asa a kwanon tasa ya yi kamari a ’yan kwanakin nan, watakila shi ne dalilin da ya haifar da zuga-zugin zogin zanga-zanga, har ta kai ga wadansu sun jefa wa Baban-burin-huriyya kalaman ankarwa, musamman jin cewa ya yi ta’aziyyar wani dan Jihar Lallaga-sisi da aka hallaka a babban birnin su Lasisi, inda suka koka kan cewa, “KO DAI BABA BAI DAMU DA KISAN GILLAR ZAMAN-FARA BA NE? Duk da cewa Baba ya mayar da martani ga masu SUKA-DA-BURTSATSEN MAGANGANU, ni ba zan zura guga in debo ruwa a kwakwarensu ba, illa dai kawai in sake zaburar da Gwamnatin Baba kan lallai ta yi mai yiwuwa tun kafin al’amura su kazance, a zo ana ta zance da kace-kauce, har ma a karke da kintace, su kuwa ’yan adawa su yi ta habaice-habaice, cewa ai hukumomi sun SUSUCE, shi ya sa harkar TSARO TA TUNKUDO TSORO, ta BALBALCE. Batun ingarman karfen karafuna titin tarragon layin kwangirin dogo, lallai a yi shi da wando, a lallaba a yi wa sauro wandon karfe ba tare da laulayin wulwulawar walagigin hannayen agogo ba.

Baba dai ya furta cewa akwai YARFEN YABEN YAYYAFIN YEKUWAR YAMUTSI, al’amarin da ya yi nuni da cewa masu wasan Samson-siya-siya da dama-damar-kurda-kurdar siyasar Damo-da-kura-diyya ke ta fafutikar yadawa a cikin al’umma, don su munana gwamnatinsa. Hakika na yarda da wannan batu, amma dai ita ma gwamnati ta shagala, har ta kai ga ana ganin gararambar Gwamna gwarangwam yana ta gara gare-gare gararam gam!

Hauribyawa mu zo dai mu sake lale, duk da dai ba falle katin cacar kubu ja da kubu baka ko canke-canke sarkin dusa muke yi ba.

Abin yi a nan kada a daga kafa wajen bin kadin al’amura, musamman a tsakanin shugabannin al’umma masu kishin zuci da tunani, don ganin cewa an kawo wannan gabar, har ta kai ga Ja-gaban masu kulkin giwa ya yi jawabin dakatar da hakar gidan ZINARU, tunda mutanen boye sun labarta masa yadda masu tsuwurwurta satar bisashe ke fakewa da guzuma su harbi karsana, wato kun ga ke nan akwai yiwuwar a GIDAN ZINARU ake ta tsuwurwurta GARKUWAR GAGARAKUWWA da FASHI DA MAKAMI, har ma da FASHI DA MUKAMI. Tunda wannan Ja-gaban masu rike kulkin tunkarar giwaye ya san da wannan boyayyen lamari, wajibi ne a bai wa al’umma damar bin kadin lamarin. Don ta haka ne kawai za a hakakke hakikanin lamuran da suka jefa al’umma jangwam, har suka yi jugum-jugum!

Kodayake wadansu masu duba zahirin lamura na iya cewa ZALUNCIN ZULLUMIN ZALAMAR ZABARIN ZULLON ZINARUN ZAMAN-FARA ba shi da wata likon alaka da sunkutar bisashe ko garkuwar gagara kuwwa, domin su aika-aikar ayyukansu duk ta takaita ne kawai a farfajiyar  GIDAN ZINARU.

’Yan makaranta ya kamata mu fasko cewa bikin magaji ba ya taka wa na-magajiya birki, haka, sannan Malam mai yaren Hau-hau wajen hawan-sa ba tare da sa-in-sa ba ya dade da furta cewa dan hakkin da ka raina, shi ke tsokale maka na-mujiya. Kai an ma ce yana yawan furta cewa, ‘raina kama ka ga gayya.’ Lallai mu yi aiki matuka gaya, ta yadda za mu yi aikin gayya ba tare da kayya-kayya ko hayya-hayya ba, har sai mun yi rugu-rugu da miyagun da ke haifar wa al’umma DARKAKIN DAWURWURIN DUGUNZUMAR DAMUWA. Kowa ya bayar da irin nasa agajin wajen ganin an farmaki masu fatattaka rayuwa da dukiyar al’umma, amma mu sani Zuga-zugin zirga-zirgar zanga-zangar zage-zage ba za su yi mana magani ba. Domin na taba fallen shafuka wani wagegen littafi mai taken ZAMANIN ZANGA-ZANGA ko BUGA-BUGAR BURGAR BAGIREN BORE, wanda ya nusar da ni cewa ba kowane lokaci  wulwulawar walagigin watangaririya wurge-wurgen wargi ke haifar da da mai na-mujiya ba. Bisa wannan dalili ina ganin lallai mu sake salon solewa da sabulun salo.

Gwamnatin Baban-burin-huriyya da daukacin jami’an jan ragamar rungumar harkokin kange al’umma daga tsoro, sai a yi ta fafutikar ganin an kawar da yanayin nan na BA TSARO SAI TSORO. Mu yi duk abin da ya dace, kafin lokaci ya kwace, tare da rokon Mai-duka Ya sa NAGARGARU su samu galaba a kan FANDARARRU KANGARARRU TSIRARU masu fasa mana GARU, alhali mun baje na-mujiya muna kallo KURU-KURU, mun yi ZURU-ZURU. Dole mahukunta da gama-garin al’umma su tsahirta da jibgar taiki ko mangala, alhali sun nuna ko’in-kula da turmutsutsun tolatsewar tutsun aura, al’amarin da ke ta haifar wa kasa da tsuwwa tsu-tsu, har ta kai ga ana ta jan jiki kama tsutsun da yunkurin falle-fuka-fukin tashi kamar tsuntsu.